Finn øll við Diabetes 2 í Føroyum

Øll, sum eru 40 ár og eldri, kunnu luttaka. Innbjóðing til kanningina er send í Mín Boks. Innbjóðingarbrævið kann síggjast her: https://www.health.fo/kunning

Kanningin tekur umleið 5-10 min. Vit taka ein blóðdropa úr einum fingri og kanna hann fyri langtíðarblóðsukrið, tvs. HbA1c. HbA1c sigur okkum, hvussu høgt blóðsukrið hevur verið í miðal teir síðstu 3 mánaðirnar. Umframt hetta verða einfaldar kliniskar kanningar framdar, so sum hædd, vekt, miðju- og mjadnamát.

Tú fær úrslitið av kanningini at vita á staðnum. Úrslitið kann antin vera: normalt, ávegis diabetes (prædiabetes), ella ábending um diabetes 2. Endalig staðfesting av diabetes 2 krevur tvær HbA1c-mátingar og fer fram í samstarv við kommunulæknan.

Kanningin kemur at ganga fyri seg í umleið 1 ár, tvs til várið 2027.

Kanningar verða gjørdar í øllum Føroyum. Hetta verður planlagt so hvørt. Kunning um, nær og hvar møguleiki verður at koma til kanningar í Tórshavn og runt landið, verður løgd út á okkara Facebook síðu Finn øll við Diabetes 2 í Føroyum. Støkk-inn kanningar koma at vera fyriskipaðar runt um í landinum alt komandi árið. Eisini ber til at bóka sær tíð til kanning. Í Tórshavn eru kanningarnar í Sigmundargøtu 5, og vit eru í gongd við at finna hølir runt um í landinum, har kanningarnar koma at ganga fyri seg. Eisini vitja vit á arbeiðsplássum. Ynskja tit, at vit koma á tykkara arbeiðspláss at gera kanningarnar kunnu tit skriva til barjo@ls.fo

Brúka leinkið, sum verður sent til tín teldupost eftir bílegging, at avlýsa tína tíð og tú kanst bíleggja tær nýggja tíð.

Persónsupplýsingar, sum tú upplýsir í samband við bóking av tíð, verða goymdar trygt og verða bert brúktar til hesa verkætlan.